மகாளய அமாவாசையும் – கண்டிப்பாக கடைபிடிக்க வேண்டிய ஐந்து விஷயங்களும் !!? மகாளய அமாவாசை 2026 எப்போது? இந்த நாளில் கண்டிப்பாக செய்ய வேண்டிய 5 விஷயங்கள் பற்றி தெரிந்து கொள்ளுங்கள்….
10.10.2026
சனிக்கிழமை….
மகாளய அமாவாசை 2026 அக்டோபர் 10 சனி அமாவாசை திதி… அக்டோபர் 09 இரவு 09.53 முதல் அக்டோபர் 10 இரவு 09.34 வரை உள்ளது.
வருடத்தில் வரும் மிக முக்கியமான 3 அமாவாசைகளில் புரட்டாசி மாதத்தில் வரும் மகாளய அமாவாசையும் ஒன்று. புரட்டாசி மாதத்தில் வரும் பெளர்ணமிக்கு பிறகு வரும் 15 நாட்களையும் மகாளய பட்சம் என்று அழைக்கிறோம். இந்த கால கட்டத்தில் பித்ருலோகத்தில் இருக்கும் நம்முடைய முன்னோர்கள் பூமிக்கு வந்து நாம் செய்யும் வழிபாடுகள், தர்ப்பணம், தானங்கள் ஆகியவற்றை ஏற்பதாக ஐதீகம். அதனால் மகாளய பட்சத்தின் 15 நாட்களும் முன்னோர்களுக்கு தர்ப்பணம், திதி கொடுப்பது வழக்கமாக உள்ளது. மகாளய பட்சத்தின் நிறைவாக வரும் அமாவாசையை மகாளய அமாவாசை என்று சொல்கிறோம். மகாளய பட்சத்தின் 15 நாட்களும் முன்னோர்களுக்கு திதி கொடுக்க முடியாதவர்கள் மகாளய அமாவாசை அன்று கண்டிப்பாக தர்ப்பணம் கொடுக்க வேண்டும்.
மகாளய அமாவாசை அன்று கொடுக்கும் தர்ப்பணம் நம்முடைய அனைத்து முன்னோர்களையும் சென்று சேரும் என்பது நம்பிக்கை. இதனால் அவர்களின் ஆத்மா சாந்தி அடைந்து, தங்களின் குடும்பத்தினர்களுக்கு ஆசி வழங்குவதாக சொல்லப்படுகிறது. இதன் காரணமாக பித்ரு தோஷம், பித்ரு சாபம் உள்ளிட்ட கடுமையான தோஷங்களில் இருந்தும், தீராத நோய்கள், கடன்கள் உள்ளிட்ட துன்பங்களில் இருந்தும் விடுபட முடியும் என சொல்லப்படுகிறது. இத்தகைய சிறப்பு மிக்க மகாளய பட்சம் இந்த ஆண்டு செப்டம்பர் 27ஆம் தேதியன்று துவங்கியது. சாதாரண அமாவாசை நாட்களில் மூன்று தலைமுறை முன்னோர்களுக்கு மட்டுமே தர்ப்பணம் கொடுக்கப்படும். ஆனால், மகாளய பட்ச காலத்தில் தாய் வழி, தந்தை வழி முன்னோர், குருமார்கள், நண்பர்கள் மற்றும் உறவினர்கள் என அனைத்து தலைமுறை முன்னோர்களுக்கும் தர்ப்பணம் கொடுக்கலாம்.
மகாளய அமாவாசை 2026 சிறப்புகள் :
இந்த ஆண்டு மகாளய அமாவாசை, புரட்டாசி மாதத்தின் நான்காவது சனிக்கிழமையுடன் இணைந்து வருகிறது. இது இரண்டு மடங்கு அதிக புண்ணிய பலன்களை தரக் கூடியதாகும். முன்னோர்களின் ஆசியையும் பெருமாளின் அருளையும், சனி பகவானின் ஆசியையும் பெற்றுத் தரும். அதே போல் மகாளய அமாவாசை, அஸ்தம் நட்சத்திரத்துடன் இணைந்து வருகிறது. அஸ்தம் நட்சத்திரத்தின் அதிபதி சூரிய பகவான். இவர் தான், தந்தை வழி உறவுகளுக்கு காரணமான கிரகம். அஸ்தம் நட்சத்திரம் வரும் நாளில் சூரிய வழிபாடு செய்வது சிறப்பு என்பார்கள். மகாளய அமாவாசை அன்று சூரிய வழிபாட்டினையும், முன்னோர் வழிபாட்டினையும் செய்வது சிறப்புக்குரியதாகும்.
மகாளய அமாவாசை அன்று கண்டிப்பாக செய்ய வேண்டிய 5 விஷயங்கள் :
1.தர்ப்பணம் – மகாளய அமாவாசை அன்று காலையில் எழுந்து புனித நீராடி விட்டு,சூரிய உதயத்திற்கு பிறகு, எள்ளும் தண்ணீரும் இறைத்து முன்னோர்களுக்கு தர்ப்பணம் கொடுக்க வேண்டும்.
2.படையல் – பகல் வேளையில் முன்னோர்களுக்கு விருப்பமான சைவ உணவுகளை சமைத்து, இலை போட்டு படையலிட வேண்டும்.
3.காகத்திற்கு படையல் – வீட்டில் சமைத்த உணவுகளில் சிறிதளவு எடுத்துக் கொண்டு காகத்திற்கு சாதம் வைக்க வேண்டும். காகத்திற்கு சாதம் வைத்த பிறகே வீட்டில் உள்ளவர்கள் சாப்பிட வேண்டும்.
4.தானங்கள் – மகாளய அமாவாசை அன்று ஏழைகளுக்கு அன்னதானம், வஸ்திர தானம், பசு மாட்டிற்கு அகத்திக்கீரை வழங்குவது சிறப்பு.
5.விளக்கேற்றுதல் – மகாளய அமாவாசை அன்று மாலை வீட்டிலோ அல்லது அருகில் இருக்கும் கோவிலுக்கு சென்றோ முன்னோர்களுக்கு நற்கதி கிடைக்க வேண்டும் என வேண்டிக் கொண்டு, மண் அகல் விளக்கில் நல்லெண்ணெய் தீபம் ஏற்றி வழிபட வேண்டும்.
